گل, آ کونول, خوش گوره لیم بو دمی,

بو دا بویله قالمایا بیر گون اولا.

کیشی, چکمک گرک قوسسئیی, قمی,

حاقدان گلیر, هر نه گلسه بیر قولا.

ار اودور ائتیقاد ائده پیرینه,

نظر ائده اولو آخیرینه.

البت, یول قدیمدیر ایلتر یئرینه,

سانا کیم نئیلرسه, سالاگور یولا.

بیز ده بیلیریک کی, دوستو, قارداشی,

بولامادیم بیر قارا گون یولداشی.

دوست کئچینیب, یوزه گولن قللاشی,

باهاسیدیر, ساتماق گرک بیر پولا.

هر کیشی بیر خیال ایله اگله نیر,

دایم اونون کونلونده اول بکله نیر.

بویله اولور سئودیگیم گاه آبلانیر,

کیمی گوردوک قییامته دک گوله.

قارونو گور بونادی, یا بولدوقجا,

ایناندی, فلک یوزونه گولدوکجه,

سن ائییلیک ائت, دورما الدن گلدیکجه,

دئدیلر: خالق بیلمزسه, خالیق بیله.

گئرچک اولان کیشی دوستدان آیریلماز,

دگمه کیشییلرده حقیقت اولماز,

سن, سنی ساتیبان, یئدیرسن بیلمز,

بو زاماندا کیمسه یاراماز ائله.

خطای, دونیانین اوته سی فانی,

بیزدن اول بوندا گلنلر قانی?

سانما دایم شاد یورویه دوشمانی,

بیر گون اولوب, نووبت اونا دا گله